Teun van Kruchten, oud hoofdransjeerder biej de NS, is pas gepensioneerd en haet meujte om zien vrieje tied door te komme. Hae leus inne gezit det d’r in ut dörp is ingebraoke biej juwelier Meijers en veult zich gerope om veur detective te sjpele. D’r is namelik door de verzekering ein beloning oetgeloof veur de goude tip!
Zien vrouw Greet is neet bliej mit ut sjpeurwerk van heure miensj en is bang veur probleme inne familie en nuujsjierige buurvrouw Lieske. Mèr Teun trik zich dao nieks van aan en wirk zich daodoor flink inne neste. Hae jeug zien vrouw, zien dochter Sjan , sjoonzoon Jan en de sjoonfamilie Gertrud en Keub Kersenmakers in ut harnas. Dan zeen d’r auch nog pliessiecommissaris Peijnenburg en de verzekeringsdetective Bep Visschers die zo heur twiefels höbbe. Wen dan auch nog de papegaai Alexander zich d’r mit geut bemeuje, mot Teun zich hiej oet zeen te redde.
Mer ja ……. meugelik is alles!

Kastelein Lei Beckers haet d’r alle meutje mit om ziene kop baove water te hawte in zien verloederd kefee “D’n Hook”. Det is gedeiltelik de sjuldj van de burgemeister en anger hooggeplaatste luuj oet et dörp.
Posbode Sjang hèlt d’r ein eigenaardige maneer van posbezorge op nao allein mèr om ziene biste vrundj Lei te helpe.
Mit behulp van eine vervalsjte breef en eine dubieuze gedeputeerde, zitte ze ein komedie op touw wo-aan Lei oeteindelik ut biste kefee van Postert aan euver hilt…!

Ut klooster van moeder overste en de zusters Lucretia, Canisia en Gemma is in grote geldjnood. Ut zuut d’r nao oet det binne inkele maondje ut klooster failliet zal gaon. Aartsbisjop Wijsen, dae jidder jaor ein waekske in ut klooster kömp oetruste, is dan auch van plan om ut klooster te verkoupe. D’r zeen zelfs planne om van ut klooster ein casino te make en de zusters örges angers te plaatse.
De biechtvader en vrundj van de zusters, pesjtoer Lucassen, kan taege dees planne nieks inbringe en griep vervolgens mer weer nao de miswien. Dan kömp opins Guus Jongeneel oftewaal meneer BIL van Building Investments Limitted. Eine flokkere en kordate miensj dae grootse planne haet mit ut klooster. Es Rianne ut klooster invluch omdet ut achtervolg waerd door eine groep drugsdealers, geit alles heel sjnel: planne om ut klooster te redde waere oetgewirk.
Es monseigneur Wijsen dan opins weer ein bezeuk wilt bringe aan ut klooster dreigt alles mis te gaon. Of ….. toch nog ein redding?

Ein kat in nood maak gekke sjprung … eine man in nood auch!
Kiek bieveurbeeld nao notaris Martin Teeuwen.
Es dae op eine daag ein alibi neudig haet veur de aovend van de zevende juli, bewaert hae det d’r dae aovend in ut gezelsjap van ziene vrundj Harry (eine advokaot) haet doorgebrach. Dae mysterieuze Harry bliek echter mit vekansie te zeen. En dan kömp Martin toet ziene gekke sjprunk.
Om alle achterdoch biej zien vrouw weg te nömme, bombardeert hae eine, veur tiedelik aangenomme, hoesknech toet ziene ‘vrundj Harry”. Helaas is deze hoesknech eine onhènjige vent, dae de ein sjtommiteit nao de anger op ein sjtapelt. En dan kömp dae echte Harry opdage, dae noodgedwonge, de rol van hoesknech krieg opgelag. En dan die sjtom teun die dae oethaolt…..!

De heer des huizes, Sef Driessen, haet zich ein zeer originele sjmoes bedach om de drankraekening in ut plaatselikke café te kinne betale. Ziene bèste vrundj Piërre proffeteerd daovan mit. Mia, de vrouw van Sef, dink aevel det Piërre die pilskes betaald…..
Mia bedink zich ein grote verrassing veur Sef ziene 50e verjaordaag. Dees verrassing haet te make mit de al eerder geneumde sjmoes!
Sef en Mia höbbe ein kindj, Theo. Of ……… zeen d’r nog meer kinjer in ut sjpel?
De bazige vrouw van Piërre wil sjnel ein huwelik regele en de dörpsposbode haet auch eindelik ein vriendinnetje.
Ut veurgaonde klink heel ingewikkeld mèr ut zeen dé ingrediënte veur eine heerlikke toneelaovend!

Ut verhaol is zo simpel es get………..
De ziepnaatfabrikant Frederik Geelen krieg heim probleme.
Zien zogenaamde boks-oetsjtèpkes veur ein gooj condisie, same mit ziene koempel Schmitz, die d’r spesjaal op touw haet gezat om ein aangenamer laeve te geneete, dreige fout aaf te loupe.
De verwarring waerd kompleet es d’r daobiej auch nog ins op mot drejje veur de oetsjpattinge van zien zoon………..